Veron & Kin's Wedding

好開心，終於到了十一月九日呢個大日子！星期六夜晚食完pizza hut，就入左去銅鑼灣海景陪新娘瞓。我同新娘都病左，居然巧合地一齊係酒店食同一隻藥！

因為瞓得唔好，第二朝起身仲病得嚴重左。六點幾起身買早餐俾新娘食，之後洗頭沖涼，無幾耐化妝師，攝影機，姊妹一一剎到。跟住執頭執尾，攞呢樣攞果樣，好忙好忙。換完衫化好妝，兄弟就差不多到啦。

經過一輪遊戲，就要酌茶啦。其實伴娘要做d咩，我真係唔知，好彩有雪芬提點。跟住再坐花車去男家酌茶，其實酌茶呢個環節都幾感動架。完左就幫新娘返酒店換衫換妝，又係執頭執尾，數下金器、pack野，都唔想食野，只係食左一件三文治。著住高跟鞋行出行入真係好辛苦好痛，個袋又鬼死咁重，仲要拎衫尾，酷刑呀。點解伴郎可以咁他條既﹖

搞掂晒就上車去伯大尼教堂。首先陪新人影相，跟住綵排行禮。婚禮開始，花仔花女先進場，然後到我進場，再到新娘同爸爸進場，我好似行快左少少，不過都無人理我啦。婚禮有聖詩啦、有vocal、有instruments、有新人誓詞、交換介子，場面好感動好開心。

我企係旁邊睇，都眼濕濕。牧師話兩個一齊最需要既係愛，呢一刻大家好似咩都有、無野缺少，但只有愛先可以令兩個人走埋一齊，不論環境順逆、疾病衰老。今日我眼見既一切、呢個婚禮，我知道佢地真係花左好多時間同精力，我相信只有好愛好愛對方先做得到。

影完晒相，就出發去利舞台玉桃軒。果度好靚呀，周圍有好多花花。我地食左少少野，影下相。開席後我坐左係主家席，但都無咩機會食野，因為我身懷新娘房鎖匙同保險箱密碼，又要同新娘出出入入，敬酒等等。不過真係好開心架！到十一點幾，送完客，換左衫，我就放工啦。不過果晚好凍，腳又痛，人又攰。