春田花花同學會

今日我地一行五人去左睇《Mcdull The Alumni》呀！其中三個都係小朋友，年齡分別係七歲、十一歲同十二歲。時間過得真係快，我記得以前見佢地，仲係BB黎架，轉眼間就話要升中學啦。今日入場既仲有好多小朋友同佢地既爸爸媽媽，坐係我後面果個小朋友，一聽到"我們是快樂的好兒童"就跟住唱，仲唱得好好添。

套戲幾好睇，無上一套咁慘，反而多左人笑(係不停咁笑)。如果你睇得明，個人又夠感性，或者有d位都喊得出既。有幾個片段印象比較深刻，其中一個係Miss Chan教小朋友點樣做社會棟樑，哦原來呢d職業先算係社會棟樑。仲有方力申做救生員對住個無人既海呼籲游客要留意既事項，唔知點解我覺得好似我。當果班畢業生由學校衝去中環，真係好得人驚，二千幾位，到底係咪個個都有位架﹖其實讀完BBBQ，做唔到"畢"飯甚至斬雞，都係好正常。斬雞呢d小事都要請畢業生，仲要用埋manual好似好諷刺，但係現實就係咁。仲有都市病"壞腦"真係一絕！之於"Point"或者"Tniop"真係笑到跌左落地。

下晝同屋企人逛超市入貨，但超市入面水洩不通，有d貨品仲被搶購一空添，睇黎香港人都係歡喜最後衝刺。