哥哥結婚了

三月十九日，良辰吉日，哥哥結婚呀。好開心呀，係我地家族盛事。婚宴搞得好 Grand，好成功。係酒店擺左二十八圍，有好靚既粉紅色氣球波波、俊男美女既婚紗照、簡單而隆重以白色為主既佈置 ... ... 嘩!!!!!!!

主人家真係好有面子，圍圍都差不多座無虛席。新娘勁靚女，成個港姐咁 ... ... 但佢係細過我架 ... ... My God!!! ... ...。但佢表現得非常大方得體，相信將來必然持家有道，可喜可賀 ... ...

諗返起原來我同哥哥雖然生命既軌跡好唔同，但係都見證住對方每個成長階段。細細個我地成日係舊屋度玩，到大個d哥哥開始鍾意同自己d同學仔玩，打球、打機、水上活動、咩都玩、抄功課、識女仔、d朋友仔多到你唔信。記得有一年我地山長水遠咁出外游水，游到好夜個沙灘鬼咁長、又無咩燈，對於少年近視既我黎講，真係前路茫茫。於是哥哥拖住我行左整個沙灘，呵。然後，我地都長大，各自為學業、為工作奔波。只會係家族聚會中咬一兩句耳仔，但每次見面都覺得佢個人成熟左d，每次都有d進步。

細個既時候，仲似為佢好唔識諗只係識得玩玩玩，但依家睇返轉頭，佢係做得最好既一個。係每個最合適既 Age，做最合適既野。我為佢而感到驕傲，所以佢結婚我真係好開心。

如果係黎緊既日子有一個好似哥哥咁既男仔出現係我生命裡面就好啦，哈哈哈。果晚喜宴過後，我又亂諗野啦，我其實都好想為自己 plan下將來既生活，希望可以好似哥哥咁做得咁好 ... ...